【6月再婚9月再做老竇】「世紀賤男」周永恒喊住認錯話虧欠兩個女太多

image

當年自認係人渣嘅34歲前歌手周永恒(Roy),因與前助手Ruby(劉依靜)搞婚外情、出手打老婆趙頌茹(阿Yu)及WhatsApp恐嚇殺死妻女並自殺,結果被網民封為「世紀賤男」。正當大家就嚟忘記周永恒呢個名嘅時候,佢最近又有新動向啦!

Roy上年年尾先同前妻阿Yu正式辦好離婚手續,之後先後搭上o靚模黃芊詠及細佢2歲嘅內地女子陳𦾡(Britni)。喺今年6月佢就宣布同Britni奉子成婚,未婚妻仲喺社交網站上載婚紗照大晒幸福,仲留言話:「可能我揀咗一條最艱辛嘅路,但無論如何我都會喺你身邊支持你,陪住你行落去。」而阿Yu就重過新生活,靠自己努力搵錢,獨力養大兩個女。

image

今日就有報道話阿Roy同Britni嘅BB會喺9月出世,佢喺接受訪問時話自己好自私,因為自己有新家庭,驚兩個女未必接受到同埋驚佢哋會唔開心,同兩個女4年冇見,其實自己好愛兩個女,成日都想見佢哋,覺得對佢哋虧欠太多,但係又怕對未出世嘅囝囝同Britni唔公平。

佢知道自己當年嘅行為係好癲同好過份,所以明白點解佢哋唔想見佢,如果囡囡肯見佢嘅話,佢唔會逃避。另一方面,佢又喊住同阿Yu講對唔住,話而家知錯,會分擔兩個女嘅生活費。

阿Yu得知阿Roy嘅道歉後,反應相當平淡咁反應話過咗4年先講呢番說話?咁得意?另外,阿Yu仲話離婚後只係收到2個月嘅生活費,喺訪問出街前突然收到三個月嘅生活費。最後阿Yu亦希望佢將來再做爸爸後,佢可以努力做好爸爸嘅責任。

image
image

遺傳晒父母優良基因 呢班星二代真係好鬼CUTE

大部分做得明星藝人,樣貌當然有返咁上下啦,一班星二代遺傳到父母嘅優良基因,所以佢哋嘅可愛指數都非常高。今日就同大家介紹一班cute cute星二代,小心被萌親呀!

梁浸浸 (鄭希怡囡囡)

image

天生一頭曲髮嘅梁浸浸今年3歲,佢除咗係鄭希怡嘅掌上明珠之外,佢亦非常深得藝人(好似阿SA、容祖兒及關智斌)及網民嘅喜愛。個囡囡咁得意,媽媽Yumiko仲幫佢開咗個IG,至今已經超過11萬個followers,每次出po都勁吸like,網民們仲紛紛讚佢活潑可愛添呀!

image
image

Jasper (陳小春&應采兒囝囝)

image

自從上年陳小春帶住囝囝Jasper(小小春)參加內地皇牌親子真人騷《爸爸去哪兒5》之後,現年5歲嘅Jasper憑著可愛外表、暖男形象、同其他小朋友得意嘅活動及年紀小但成熟嘅表現,成功深受觀眾喜愛,喺兩岸三地瞬間爆紅。就嚟播出嘅《爸爸去哪兒6》,陳小春同Jasper兩父子冧莊演出,喜歡Jasper嘅朋友就記得留意啦!

image

小春雞 (黎諾懿囝囝)

image

黎諾懿上年榮升爸爸後,錫到囝囝黎峰睿(小春雞)燶,經常喺社交網站上載囝囝影片及相片,同大家分享佢嘅成長點滴。小春雞唔經唔覺已經1歲幾啦,佢最近仲識得同佢屋企嘅狗仔玩,佢真係越睇越可愛。

image
image

Jacques 及 Avner(周汶錡囝囝)

image

名模周汶錡(Kathy)嘅一對囝囝Jacques及Avner遺傳晒爸爸媽媽嘅優良血統,分別3歲同1歲嘅佢哋越嚟越靚仔。有仔萬事足嘅Kathy經常帶囝囝周圍去,仲分享唔少囝囝嘅得意相上網,佢哋活潑又可愛,真係好想搣吓佢哋面珠登呀!

image
image

包包 (徐榮囡囡)

image

徐榮細女徐心怡(包包)前年喺《愛‧回家》飾演馬家好,佢憑住面圓圓同眼仔碌碌嘅萌爆樣一炮而紅,成功俘虜唔少觀眾同網民嘅心,佢哋知名度秒速提升到同自己爸爸差唔多。包包當時更成為廣告商寵兒,帶挈埋爸爸一齊拍廣告,實行父女檔齊齊掘金。轉眼間包包已經兩歲幾差唔多三歲,佢仲愈大愈精靈,真係好得人鍾意呀!

image

冧之之兄妹 (朱薰仔女)

image

DJ朱薰育有一子一女,佢哋就係5歲嘅譚永之同埋2歲嘅譚在之(妹之)。朱薰經常喺社交網站上載一對仔女嘅成長點滴同埋得意短片,佢哋兩個成日表情多多又搞怪,萌度爆晒燈,成功帶歡樂同正能量俾大家,冧得唔少藝人及網民成為佢哋嘅粉絲。

image
image

Gabriel 及 Aurelie(官恩娜仔女)

image

官恩娜(Ella)婚後專心照顧家庭,努力照顧老公同一對仔女,更令佢廚藝大躍進,搣甩「地獄廚神」呢個污名。就嚟3歲嘅囝囝Gabriel(BéBé G)同7個月大嘅Aurelie,長得非常趣緻,顏值爆棚。難怪Ella經常喺社交網站分享佢哋一家嘅日常照,真係羨慕死人啦!

image
image

Sofia(梁詠琪囡囡)

image

梁詠琪(Gigi)嘅可愛混血囡囡Sofia,活潑又可愛,唔經唔覺已經三歲幾,佢擁有深邃嘅五官加上一雙修長美腿,簡直係遺傳晒爸爸媽媽嘅優秀基因,唔少人仲話佢似迪士尼卡通電影《怪獸公司》入面嘅大眼妹阿Boo。

image
image

陳真 (黃伊汶陳國坤囝囝)

image

黃伊汶(Emme)、應采兒同鄭希怡老友鬼鬼,佢哋間唔中都會帶埋小朋友一齊去親子旅行,所以小朋友間嘅感情都好好。Emme囝囝陳真越大越靚仔,而家差唔多兩歲半嘅佢,最近又同埋爸爸媽媽去咗馬爾代夫旅行,佢哋仲影咗唔少靚相,唔少網民都大讚佢型仔又靚仔。

image
image
image

家燕姐年尾殺入紅館開個唱 疑似流程流出表現瘋狂跳十字步?

image

早前上映嘅超級英雄電影《復仇者聯盟3:無限之戰》全城熱爆,唔少人都討論故事發展及剩低嘅無限寶石究竟喺邊度,網民仲拎咗薛家燕(家燕姐)額前粒大痣開玩笑,話七粒寶石就喺家燕姐度。一向玩得嘅家燕姐就化身「Captain Nancy 十字步女俠」,喺社交網站上載一張自己手持盾牌,額上有寶石發出光芒嘅圖片,仲留言叫大家放心,寶石仲喺佢度,佢會力保護池力共鎮。近日家燕姐就食住個勢宣布年尾將舉行首個紅館個唱。

image

現年68歲嘅家燕姐入行60周年,首次殺入紅館就同網民玩埋一份,演唱會都同「Captain Nancy」有關。而演唱會海報及主題曲《Captain Nancy》MV Trailer 已經喺日前公開,家燕姐嘅造型十足十超級英雄啲電影咁。咁演唱會嘅流程呢?喺噚晚網絡紅人King Jer就出PO幫家燕姐諗咗個rundown,個rundown大致上有瘋狂跳十步、觀眾互動環節及唔同版本嘅《皆大歡喜》,例如係金家上下連同下人合唱版、時裝版、Punk Rock 版、黎小田合唱版及EDM Remix版等等。

https://www.facebook.com/KingJerEntertainment/photos/a.229707817101090.55175.169934393078433/2132751453463374/?type=3&theater

家燕姐睇完個流程之後,仲好搞笑咁回應佢話瓊姐支持佢,好多謝幫佢諗Rundown,仲話自己60年嚟好多經典作品,遲啲同佢分享。

image

除咗囝囝喺年中結婚之外,家燕姐自己又喺娛樂圈立足60年兼年尾搞演唱會,今年對佢嚟講真係意義重大呀!

《大軍師司馬懿》吳秀波張鈞甯演技大爆發 完美演繹歷史人物獲讚賞

image

由吳秀波、劉濤、李晨及張鈞甯等人主演嘅內地古裝網劇《大軍師司馬懿》分為第一部《軍師聯盟》與第二部《虎嘯龍吟》,劇情以「三國」軍師們鬥智鬥力為題材,講述司馬懿傳奇嘅一生。上年喺內地播出嘅時候已經成功掀起熱潮,贏盡口碑,總點擊率達到60億。「三國」題材經常都有人翻拍,但點解呢套劇成功脫穎而出呢?除咗精彩嘅鬥智鬥力及緊張嘅推理劇情之外,演員們嘅精彩演繹都係劇集嘅主要成功因素。

劇集圍繞司馬懿嘅愛恨情仇及與勁敵鬥智為主,劇組就搵咗「國民大叔」吳秀波嚟飾演三國時期最強軍師「司馬懿」。吳秀波飾演「司馬懿」青年至老年,佢將每個階段嘅「司馬懿」都演得淋漓盡致、入型入格,唔少內地觀眾都對佢嘅演技讚不絕口,俘虜唔少內地網民嘅心。司馬懿係魏國軍師,喺第一部《軍師聯盟》就講述佢同曹操周旋的半生及輔助曹丕(李晨飾)成為太子,後來登基稱帝。第二部《虎嘯龍吟》就講新帝君曹叡再次起用司馬懿,不過劇情主要講佢同蜀國軍師諸葛亮之間嘅鬥智鬥謀,例如「空城計」及「死諸葛嚇退活仲達」等等,同埋最後要打「final boss」曹爽。司馬懿晚年變得殘酷,提到觀眾可肉緊。吳秀波每個眼神都有戲,佢仲憑角色成為17年國劇盛典「年度傑出劇星」。

image

唔單止吳秀波受注視,台灣女星張鈞甯亦令觀眾留下深刻印象。張鈞甯貴為台灣氣質女星,話佢係靚女,相信冇人會反對,佢真係飾演司馬懿妾侍柏靈筠嘅不二人選。佢係曹丕表面送俾司馬懿嘅女人,實則係派過去嘅間諜,內心充滿心機,去到之後真係鍾意咗司馬懿,多次為佢獻計解難。佢更喺劇中演技大爆發,好似佢發現司馬懿為咗逃避曹爽迫害而裝病,但係自己竟然毫不知情,佢一邊喊一邊問司馬懿嗰幕,真係好有感染力。去到最後佢仲為司馬懿葬身火海,睇到觀眾心都噏晒呀!另外,為咗呢套劇,佢不惜化老妝上陣,真係好敬業樂業呀!

劇集已經喺hmvod上架,想睇嘅朋友可以去煲餐飽呀!

人肉發電機有新目標?傳蔡思貝暗撻外籍壯男

image

13年港姐亞軍出身嘅蔡思貝,入行後拍劇出騷機會多多,已成為無綫力捧上位小花。佢除咗事業進取之外,對愛情都同樣進擊㗎。短短幾年已經有好多位男藝人同佢傳過緋聞,好似有洪永城、周志文、鄭俊弘、溫家偉、張振朗、王浩信及余德丞等等,所以佢亦被封為無綫新一代「人肉發電機」。最新傳出貝貝有新目標啦,呢位男士係一位外籍人士㖭呀!

根據報道指近日王君馨同老公約咗一班朋友食晚飯,而身穿小背心嘅蔡思貝成為坐上客。佢同坐喺隔籬嘅外籍壯男非常投契,全餐飯佢哋都雞啄唔斷,傾倒興起時貝貝仲手足舞蹈。貝貝同呢位外籍壯男被形容露出心心眼嘅表情,似乎互相都有好感。

莫非貝貝今次真正遇上Mr.Right?

image
image
image

前空姐空少上《Mean傾》大講行內秘聞

image

好多人都覺得做空姐空少可以環遊世界,又可以著住套制服扮到好靚咁返工。但事實上佢哋平日遇到嘅問題一啲都唔簡單。Yahoo TV 全新自家製娛樂節目《Mean傾》嚟緊嗰集嘅討論題目就係空姐,以下幾位前空中服務員依家成為YouTuber、網絡作家及藝人,佢哋仲上嚟節目大爆辛酸史及秘聞。

image

「90後」嘅Jennifer喺英國讀完大學後返香港做空姐同埋市場策劃,但之後發現性格不適合,辭職轉做全職YouTuber。而佢個影音平台頻道內容經常圍繞空姐,令佢喺短時間內爆紅,而家已累積超過6萬6千個訂閱者。

第二位係「80後」嘅Sun,佢以「業餘空少飛sun」成為網絡作家/ 插畫人,Sun大學主修會計系,畢業後成功加入「四大」工作,捱咗三年後,佢決定尋求work-life balance,於是轉投航空業。網絡中佢會經常講飛機上嘅所見所聞及趣事,今年仲出埋書介紹紀錄飛人生活。

image

另外一位係童星出身嘅黃芳雯(Paula),細細個就同過譚玉瑛、黎芷珊、周星馳及鄭伊健等演出過《430穿梭機》同埋之後嘅《閃電傳真機》。佢一畢業就成為空姐,後來轉做有線主播,而家係奇妙電視藝人,同埋已經結咗婚生埋小朋友啦。最近佢仲想北上發展,同多個拍檔喺深圳開一間過萬呎嘅親子餐廳。

「美女學徒」程美段被退出節目 原因究竟係乜?

image

由蕭正楠、林盛斌及張振朗主持嘅《美女廚房》,無論收視及口碑都冇上輯咁好,不過佢哋嘗試努力改善,反應都唔算太差。早前劇組就宣佈加推6集,仲幫一班「美女學徒」換上紅黑色嘅新制服。唔少「美女學徒」加入節目都係為打開知名度,雖然鏡頭唔算多,但係起碼有拍攝機會。不過有指其中一位「美女學徒」程美段(Kiwi)原來巳經無聲無息下被退出節目拍攝。

image

有報道指Kiwi話節目監製叫PA同佢講,新嘅集數唔使佢再返。之後佢問及原因嘅時候,PA就淨係答佢唔清楚,唔好意思。Kiwi就話原因應該係有一次拍完反應Shot,佢就問PA夜晚可唔可以行開,請假去臨時收到通知嘅Casting。點知監製喺隔離,仲好大反應咁話如果你今晚唔出現以後都唔使嚟。監製講到咁,Kiwi當晚就選擇留喺廠冇去Casting。佢當晚提出早走呢個要求,因為平時都有女仔試過早走,因為佢哋唔係淨係得一個job,佢哋都會出去接其他job,不過嗰晚咁啱唔夠女仔。

image

不過亦有傳佢被退出嘅原因係佢拍藝術祼照,仲指高層好大反應,好唔鍾意。同埋早前有傳無綫叫佢哋唔可以性感,同唔可以接job,佢就懶理無綫禁令,著爆乳露腰衫加上熱褲,毫不吝嗇大晒E Cup身材喺動漫節出現。

究竟點解Kiwi會被踢走,真係淨係得監製同當事人先知喇!

image
image
image
image

JC陳詠彤上《中國好聲音》唱成名作《說散就散》獲導師網民大讚

image

曾被黎明力捧嘅女歌手陳詠彤(JC),前年憑住出道作《說散就散》為人認識,不過可惜紅歌唔紅人,唔少人連佢係咩樣都未必有印象。星運平平嘅佢近排轉戰內地,現身由周杰倫、謝霆鋒、李健及庾澄慶做導師嘅內地歌唱選秀節目《中國好聲音2018》,更唱出成名作《說散就散》。

image
image

喺第四集嘅導師點歌環節中,李健就點咗《說散就散》,原唱者JC上台落力演唱,佢深情演繹歌曲,獲得導師們賞識,庾澄慶及李健更轉身大讚其唱功。李健仲話JC一唱佢就斷定佢係天生唱歌嘅人,不過最終佢選擇加入庾澄慶嘅戰隊。佢仲話首歌喺香港好紅,但就冇人認得佢個樣。跟住周杰倫就心同感受咁話自己推出第一隻碟後,成條街都播住《黑色幽默》同《安靜》,但就冇人同佢打招呼,為咗俾人認到佢,周董仲試過著宣傳海報嘅衫,但係都冇人認得佢,所以佢好明白JC嘅感受。

節目出街後,JC瞬間爆紅,引起網民熱烈討論,唔少人激讚佢「唱得好好」及「唱出故事了」等等,「說散就散原唱」更登上微博實時熱搜榜第一位。相信經過比賽之後,好多人都會記得佢個樣同歌聲。

image
image
image

【會唔會同衛蘭合唱?】御用野蠻奶奶盧宛茵演而優則唱 計劃出唱片做樂壇新人

image

無綫御用野蠻奶奶盧宛茵,早前喺劇集《BB來了》完美演繹尖酸刻薄嘅強勢奶奶,唔少觀眾大讚佢演得入型入格,更令佢人氣急升。大家唔好以為佢淨係嗌交同鬥嘴叻呀,其實佢好唱得㗎!佢早前接受訪問時,Madam Lo就話而家仔大女大,佢覺得自己係時候追夢,計劃做樂壇新人出唱片,仲話屋企人都好支持佢。

image
image

咁Madam Lo趕唔趕得做今年出道呢?佢接受傳媒訪問嘅時候話而家仲好初步,唔會係今年嘅事,係有計劃但未實行,不過自己不嬲鍾意唱歌,間唔中都會同朋友Jam歌,出碟嘅話應該會唱英文歌多。

現年65歲嘅Madam Lo擅長唱爵士樂曲,聽貝多芬同莫札特嘅音樂長大,如果佢聽時代曲嘅話,佢爸爸會鬧佢。

Madam Lo已經開始計劃出唱片,不過佢都會繼續演戲,所以鍾意睇佢做戲嘅朋友可以唔使擔心呀!

【陳凱琳蔡思貝十大不入】網上票選十大厭惡無綫藝人 暫時邊個係第一?

image

最近有網民喺網站搞咗個「我厭惡的十大無綫男女藝人」嘅投票,等我地睇下現時嘅走勢啦!

第十位:王浩信

image

憑劇集《不懂撒嬌的女人》Saving成新一代暖男嘅王浩信,人氣急升,喺劇中嘅深情融化唔少少女嘅心。可惜喺現實生活中,婚後仍然緋聞多多嘅佢同陳自瑤婚變傳聞不斷,最近傳出陳自瑤已主動提出離婚。受離婚傳聞影響嘅男神王浩信,被網民稱為偽暖男,令人氣秒速下滑。

第九位:林師傑

image

巨聲幫林師傑平時都工作量唔多,不過就經常見報。早年緋聞不斷嘅佢有過唔少緋聞女友,連佢舊愛鄧穎芝都暗寸佢隔日就影到一個。不過近年已經修心養性,仲向拍拖3年女友歐陽巧瑩求婚。

第八位:崔建邦

image

有賤男之稱嘅崔建邦,偷食緋聞傳過唔知幾多次,又有打女朋友前科,網民唔鍾意佢都正常嘅。

第七位:黃翠如

image

「宅男女神」黃翠如過檔無綫後極速上位,差唔多套套劇集都擔正做女一,可惜被評佢嘅演技麻麻,無論做咩角色都只得一個表情,最終搞到觀眾反感。

第六位:吳業坤 

image

14年坤哥為《萬千星輝賀台慶》其中一part扮棋,當時唔少人都戥佢唔抵,事件令佢備受注目, 之後喺頒獎典禮攞咗唔少獎項。可惜坤哥被揭感情生活混亂,又傳背住前緋聞女友Super girl成員Aka識女仔,更被網民話佢係「偽毒」,踢爆佢係扮傻扮被動,搞到以前傻傻戇戇嘅宅男形象冇曬,

第五位:何雁詩

image

巨聲幫何雁詩向來星運平平,上年被指介入鄭俊弘同未婚妻Beebs之間做第三者,之後更急速公開戀情,令佢同鄭俊弘形象插水。

第四位:陳百祥

image

一向言論出位嘅陳百祥(叻哥)經常公開發表時事評論,次次都語出驚人,好似早前佢上港台節目《視點31》,期間直斥高爾夫球場起住宅係荒謬,仲話香港嘅住屋問題一直都存在:「你嚟得香港住,就要接受香港從來都係貴嘅地價㗎嘞,而家講緊西雅圖,美國人都要瞓街,而家都係瞓細啲嘅房,細啲嘅廳。」,言論一出即引起觀眾不滿。

第三位:李思捷

image

被喻為「溝女王」嘅李思捷,緋聞多多,就算佢近年都無咩節目同劇集演出,但仍然無減佢喺網民心目中嘅討厭程度。

第二位:林盛斌

image

擔任節目主持一向出色嘅阿Bob,本來都幾有觀眾緣,不過太多廣告 、節目及劇集都有佢份,不過觀眾緣就麻麻。最近無綫播出新一輯《美女廚房》,唔少人都話因為有佢而罷睇。

第一位:鄭俊弘

image

上年,乖乖仔形象嘅鄭俊弘被爆出背住未婚妻Beebs暗交何雁詩,網民最討厭一腳踏兩船嘅人,更封佢為「世紀賤男」,形象插水。